Carolina del Norte ye un estáu del sureste de los Estaos Xuníos. Llenda con Carolina del Sur al sur, con Georgia al suroeste, con Tennessee al oeste, con Virxinia al norte y col océanu Atlánticu al este. Recibió'l so nome del rei Carlos II d'Inglaterra, que nomó así a esta tierra n'honor de so pa, el rei Carlos I d'Inglaterra. Ye'l ventenu octavu estáu más grande de los Estaos Xuníos, y el décimu más pobláu. Tien trés árees metropolitanes con más d'un millón d'habitantes, y una población total de 10 439 388 habitantes (1 abril 2020)[1][2].
El so territoriu divídese en 100 condaos. La so capital ye Raleigh, y Charlotte la mayor ciudá. Nos caberos 50 años la economía del estáu tresformose enforma, pasando de ser un estáu perdependiente del sector agrícola y testil a un estáu con una economía más diversificada, con gran pesu de los sectores de la enerxía, inxeniería, bioteunoloxía y finances.
El territoriu del estáu divídese en trés fasteres xeográfiques principales: la llanura costera, qu'ocupa'l 45% de la so estensión; la rexón de Piedmont, tamién de pocu altor sobro'l nivel del mar, qu'ocupa'l 35%; y, al oeste, una zona montañosa qu'abarca la rexón de los Apalaches y Foothills. El so altor va dende'l nivel del mar hasta los 2.037 m del monte Mitchell, el más altu del este de los Estaos Xuníos. No que cinca al clima, el de les llanures costeres ta perinfluenciáu pola cercanía l'océanu, y la mayoría del estáu (sacante la fastera occidental, más montañosa) inclúise na zona de clima húmidu subtropical.
